蘇韻姿泳裝戲　「老竇」劉丹嫌太多布

劉丹、呂慧儀、滕麗名、蘇韻姿、馬貫東及許家傑等到紅磡宣傳處境劇《愛．回家之開心速遞》，大玩夏日遊戲，眾人分組戴上水泡玩「收賣佬」遊戲，演變成互相拉扯爭道具，現場混亂一片非常搞笑，身穿緊身衫的呂慧儀打扮激凸，不顧儀態與蘇韻姿玩到癲，單立文則將Bikini上衣笠上眼，又與林淑敏搶道具，而被網友選為「最佳螢幕情侶」歐瑞偉及李偉健亦默契十足，場面熱鬧。

介紹角色期間，劉丹特別叫「細女」蘇韻姿行出來自我介紹，之後兩父女孖住受訪，劉丹直言想多給機會新人：「我都做過新人，當時前輩冇咩機會畀我哋，我就覺得要提攜下佢哋，之前我有叫周嘉洛（劇中外孫）出嚟講嘢，但佢講到口窒窒，畀我鬧咗餐，應該要隨時做好準備！（覺得韻姿拍戲表現點？）佢中文麻麻，外表又傻傻哋，但其實好醒目！背好多對白都好快。」獲讚的蘇韻姿表示會請「老竇」食飯，劉丹即說：「佢平時好識做㗎！會幫我買咖啡。」

講到蘇韻姿早前一場泳衣戲在網上回響甚大，劉丹插嘴說：「其實我覺得太多布！」嚇得蘇韻姿說：「阿爸！嗰個時間人哋食緊飯㗎！」她又指不介意再拍泳衣戲，但要視乎劇情，問到身形是否隨時Ready？她笑說：「我平時食好多嘢呀！」