傳譚玉瑛秘婚　李家鼎護駕：有又點？

藝人李家鼎與譚玉瑛出席「阿爺廚房」活動，並即席炮製叉燒，早前於書展期間推出食譜的李家鼎，透露銷售情況理想，日前打風日食譜已告售罄，現時宣布加印6千本，問到書商可有與他再傾推出新書？李家鼎謂：「有講過吓！慢慢先，太密出唔好，好似呃人咁。（主持無綫煮食節目後搵好多錢？）希望啦！之前都接咗去澳門兩日煮嘢食工作，再傾緊去另一個地方。（係咪會開私房菜？）9月喺銅鑼灣開。（有冇旅行團邀請你做嘉賓？）未敢接住，我頂唔住。」

談到鼎爺工作不斷，是否少了時間湊孫？鼎爺即一副慈祥爺爺模樣：「係少咗時間，但個孫仔依家好跟人，除咗扭眼瞓同食嘢會嘈，仲識行添，不過未識叫我，有時買嘢畀佢會好嗲。（平時多數你下廚？）係，都會教媳婦煮，佢幾好㗎！」

而譚玉瑛對於再被追問秘婚事宜，李家鼎即為她護駕謂：「我係譚小姐代言人，有咩問我啦！有又點冇又點。」譚玉瑛則謂：「有乜好講，講嚟無謂啦！」