【獨家】7位數開髮型屋　瑪姬有仔埋身

東網早前拍得藝人黃建東跟前DJ瑪姬（Maggie）在街頭又攬又錫而傳出緋聞，但「黃瑪戀」僅三個月多疑玩完。事緣，日前身穿白色小背心的Maggie出現大埔翠樂街，同行有位着白裇衫，貌似「韓仔」的高大男子，兩人全程表現糖黐豆，不時交頭接耳十足情侶，期間見兩人合力將一大盒紙箱搬入一正裝修的地舖內。

由於天時暑熱，加上地舖室內未有裝冷氣，身穿裙子的Maggie擒上木梯指手畫腳一輪後，縱使着了低胸背心讓「事業線」外露抖氣，仍熱到全身濕透要用手當扇撥涼，新歡見Maggie又熱又渴，就即時「做嘢」陪她買飲品消暑，更怕買一支水未夠喉，一次過買了一大袋飲品，Maggie有凍飲入口隨即爽晒，掏出手機自拍影靚相。Maggie疑似新歡曝光後，另有讀者提供數張Maggie驅車到鴨脷洲停車場的照片，相中見瑪姬有一男子同行，而該男士外貎跟大埔出現的「韓仔」貌似，爆料人稱兩人落車後用手推車搬貨上樓。

同黃建東只係朋友

Maggie看過讀者提供的照片後，接受東網訪問時表示：「係我一個好親密嘅男性朋友，（係男朋友？）因為佢係圈外人，所以唔方便講咁多喇。（咁黃建東呢？你哋係咪感情冷卻呀？）吓？我哋從來都冇撻着過，又點嚟冷卻呢？我同阿東不嬲都係好朋友嚟，唔信可以問我身邊啲朋友，好多人都習慣咗我哋孖公仔咁出現。」

據知Maggie一直主力司儀工作，因口才好兼精通多國言語，在司儀界密接job，曾創下一個月內接了22個event穩袋六位數字的佳績，雖近年event數量不如幾年前的好，但仍不愁「無job」做，加上她投資有道，三年前已買入千萬豪宅，加盟王祖藍經理人公司後，見事業發展穩步上揚，覺得可嘗試踏足商界，最近投資7位數字在大埔開髮型屋做老闆娘，是圈中的隱形小富婆。