女神生咗喇!孫慧雪誕8磅10囝囝

20170802
東網電視
更多新聞短片
恭喜!恭喜!!

35歲孫慧雪(雪雪)今年二月宣布懷孕,時不時晒巨肚嘅佢預產期係八月中,雖然之前已經預告過B仔好可能係巨嬰,點知到咗今日,雪雪就喺Facebook報喜宣布誕B仔,真係可喜可賀!

Facebook報喜宣布誕B

雪雪喺Facebook上載同囝囝頭貼頭合照,仲身在產房嘅佢精神唔錯,雙手抱住仲係喊緊嘅囝囝,而雪雪仲大爆囝囝重8磅10,真係夠晒足磅,英文名改咗做Riley,中文名就留畀長輩改:「和大家報個平安,親愛的小寶寶已經來到我們的生命裏了!是一位小男孩~重8磅10 在此要感謝為我們迎接這位小寶寶的醫生們和在產前不斷為我打氣的護士們,還有一直關心我們的家人和朋友們,愛你們喔❤ P.S.原來逗留在肚子裏差不多有十個月的小人兒,是長這個模樣,既陌生又熟悉,爸爸媽媽會一直愛著你!圓圓的臉像個小饅頭☺️ #mylittleriley」

生完即病日日戴口罩

因為BB體形太大,本身諗住順產嘅雪雪聽醫生建議改為開刀,雪雪向東網透露,7月28號小Riley已經出世見人嚟,不過因為係新手媽媽嘅佢太手忙腳亂,加上生完即刻惹上重感冒,所以搞到依家先公布:「啱啱生完之後,可能抵抗力唔係咁好,跟住就病咗,我一直戴住口罩,所以BB都仲未見過我個樣!佢個樣同佢老竇一模一樣樣,一啲都唔似我,但係面形、手指、腳趾都似我,下巴尖尖。之前我哋怕佢冇咩頭髮,所以生之前我食咗好多好多芝麻糊,好彩出世都有啲啲頭髮。」雪雪續指BB夠晒「高」,身長53cm,頭圍亦過10cm:「醫院個個姑娘都知佢好大食,我生完都要成日要醒住同餵佢,瞓得唔係咁好,不過老公都好好,入院到成個生產過程都陪住我,好多嘢都要幫我準備!」

爆蔡思貝「未卜先知」第一個知佢生仔

一直未有同任何人公布好消息嘅雪雪,指好友蔡思貝竟在生產當日主動詢問「你係咪生緊仔呀?」,所以雪雪都send咗BB嘅相畀佢,思貝都話BB似足雪雪老公添。雪雪又提到身邊好友都想前往探兩母子,不過仍覺手忙腳亂嘅佢就叫大家等佢適應咗先見面。而另一好友林秀怡就會負責幫忙派薑醋。