被禁獨自夜跑！IG女神卓楓而自爆遭跟蹤

「IG女神」卓楓而（Candice）日前趁住書展推出寫真集，由於樣貌與女星Angelababy相似，成功俘虜萬千宅男心，其寫真集推出不久已火速售罄，擁有40吋長腿的Candice近日踩過界，由模特兒轉投做樂壇新人，日前推出處女歌《end of time》，並獲經理人落重本飛到塞班島拍攝MV。

家人禁夜跑

Fit爆的Candice近月為愛上獨自夜跑練氣，對於日前發生一名19歲女夜跑時在順天邨險遭強姦，Candice直認睇完新聞驚心動魄，其雙親已禁她獨自夜跑，並要求她收工火速回家，原來Candice住案發地點附近，她說：「睇完新聞好驚，因為我住附近，平時跑步都會經過，依家真係唔敢一個人跑，同埋屋企人話太危險唔畀我夜跑。」記者笑指找男朋友陪跑，自稱單身的Candice抵死說：「如果有男朋友就好喇，可惜冇。」

急搵經理人求救

樣子清純的Candice透露近日發現有人跟蹤，嚇到她火速致電經理人求救，她說：「有日出門口行去搭車，發現有個男仔跟住自己同一齊上車，即刻通知經理人，落咗車即衝去商場女廁，好彩出嚟時已經唔見個男仔。」問到為何不報警？Candice猶有如悸說：「冇諗咁多，當刻只想撇甩對方。（有冇同屋企人講？）收工返到屋企先講，當時唔講係唔想令父母擔心，加上經理人即刻飛的嚟陪我。」