戴蘊慧戴辛蔚原來未試過同台唱歌

歌手戴蘊慧、戴辛蔚、露雲娜、林一峰、張崇基、張崇德等晚上在將軍澳電視城為無綫節目《流行經典50年》擔任錄影嘉賓，戴蘊慧與戴辛蔚兩姊妹原來是首次同台獻唱。兩人一齊受訪，戴蘊慧表示：「同台唱歌係第一次，今晚唱我當年首歌《西飛客機》，搵佢（指戴辛蔚）出嚟同我一齊唱係因為首歌好難唱，我又好耐冇唱過歌，有佢陪住就定啲。都有練歌，佢有教人唱歌經常唱歌就唔會怯場，我就好少唱。（有冇興趣一齊出碟﹖）隨緣啦，玩票性質先，畢竟都離開咗呢行咁耐，玩吓感覺會好啲，當係一份工作壓力會好大，同埋冇咁好玩。」戴辛蔚說：「未有計劃，但係都唔抗拒。」

講到近況戴蘊慧笑言忙於鑽研烹調美食，閒時宴請朋友及旅行找食材，戴辛蔚大讚姐姐廚藝說：「佢煮嘢食真係好好食，拿手嘢好多，中菜、西餐、日本菜、泰國菜、印尼菜都得。」問到戴蘊慧可有興趣開私房菜？她透露反而有興趣出食譜：「都有人搵我開，都係嗰句，當咗興趣係工作就冇咗嗰份情趣。（出返嚟唱多啲歌？）隨緣啦，應該都唔會喇，做慈善就可以。」