王若琪創作國語歌望衝出香港

歌手王若琪（Takki）早前到台灣為朋友創辦的雜誌拍照，並出席「女女好玩節」活動：「題材係女性，除咗有表演，仲有十間展覽房，展示唔同藝術家嘅作品，全部都以女性為主題。」她坦言很開心代表女性到當地演出：「之前同其他創作人一齊出過一隻台灣合輯《Her》，我覺得同台灣好有緣，又同女性呢個主題好有緣。」活動當天，她選唱了台灣樂隊Hello Nico的歌曲《花》：「我好鍾意佢哋嘅風格，好英倫風，係我好鍾意嘅風格。台灣嘅觀眾朋友好熱情，好尊重表演者，好接受另類音樂同話題，所以我好享受。嚟緊我好想做啲國語歌，試吓去第二度發展，但我係香港人，廣東歌一定會照做。」

表演以外，Takki笑言去台灣一定要食：「近兩次去做嘢都有朋友同我哋一齊玩，最緊要打個麻辣邊爐同去夜市。我最鍾意去寧夏夜市，嗰度有檔鹽水雞超好味，我哋仲同老闆娘講，如果有真空包裝，一定買好多返香港！」工作方面，她透露最近與兩位認識已久的朋友夾歌：「佢哋係以前幫我伴奏嘅結他手同琴手，現階段嘗試做一啲Cover歌。近排我寫咗好多歌，希望拍片擺上網同大家分享，如果反應好就派台。」