東方日報C1：謝安琪專心湊女退出樂壇？

天后謝安琪（Kay）自三月誕下細女後一直深居簡出，昨日她罕有現身公開活動撐好友蕭潤邦的生煎包店開張，並透露入股進軍飲食界，更似暗示復出無期，現階段她坦言很享受家庭生活，實行全職湊女！

已有一子的女神謝安琪誕下囡囡張靖（Karina）後一直專心湊B，並不時在社交平台分享相夫教子的少奶奶生活。繼七月初在囡囡百日宴時公開露面後，昨日Kay與江若琳、陳柏宇、JW、莊端兒、迪子、DJ當奴兩公婆、少爺占、王宗堯及小肥等，現身支持好友蕭潤邦（Oscar）的銅鑼灣生煎包店開幕。眾人一起剪綵及切燒豬，吸引不少途人冒雨圍觀。仍有點面圓圓的Kay，受訪時透露已入股Oscar的大埔店及銅鑼灣店，直言兩人相識很久，今次趁機偷師，將來創業搞生意：「想做生活嘅嘢，做啲有機清潔劑、環保布袋等，但呢啲好難營運，加埋飲食就方便啲，所以依家學師先。（想幾時做生意？）十年內。（咁耐？）要搜集資料嘛。」

問到現時忙湊仔女，又要學做生意，何時才會重返樂壇唱歌？她即笑言：「我依家仲好肥，唱咩歌呀！同埋依家心態同以前好唔同，依家生活他條啲，以前日日Keep住工作狀態，好享受依家生活。」言談間似乎暗示復出樂壇無期！她又開心分享目前湊女生活，笑言囡囡會玩行為藝術，把口水流到床單上造出不同「圖案」，而大仔張瞻就忙踢波，發展自己「事業」。

天后辛酸　張繼聰心痛

對於Kay似乎有意退出樂壇，老公張繼聰昨日透過電話表示：「佢係講緊心態同狀態，太太依家好明顯唔係表演者嘅狀態，佢依家係BB行先，佢好偉大，感激佢打理好屋企，等我畀心機做嘢。」他亦坦言Kay會否再唱歌視乎其個人決定：「佢呢刻狀態上當然完全唔ready，長遠嘅嘢冇人知，但作為老公梗係支持佢。（唔唱都支持佢？）其實我好矛盾，佢一來係唱得好好嘅歌手，但另一方面呢行有好多辛酸，作為老公梗係唔想佢承受壓力。」

獨孭重擔　暫無意追B

問到如果Kay不再唱歌，只靠他工作，其負擔可會更重？阿聰笑言：「你睇吓我膊頭愈來愈大隻就知頂得順，不過一家人唔係建基於搵幾多錢，我哋算係容易滿足。」提到若Kay不復出，兩人可以再生B，阿聰就表示未有此打算：「兩個都夠晒數，唔想老婆再咁辛苦。（同林盛斌一齊結紮？）佢直情係生育協會會長，會長級先要結紮，佢呢啲異於常人。」

此外，Kay昨晚在社交平台上載與仔女合照，留言致歉並澄清：「需要同大家解釋一下，我唔係覺得肥就唔可以唱歌，我表達得唔好，希望大家唔好介意。」又指現階段很享受家庭生活：「呢啲美好嘅時光對我來講非常寶貴，所以唔會為咗工作對此設下一個期限。」

更多新聞，請瀏覽東方日報網頁：

http://orientaldaily.on.cc/