鄭伊健林曉峰合體唱《友情歲月》

「來忘掉錯對，來懷念過去。」呢兩句歌詞，相信大家都會諗起90年代紅極一時嘅電影《古惑仔》系列，呢一套電影可以話係香港人嘅集體回憶，喺戲中飾演「陳浩南」嘅藝人鄭伊健同飾演「包皮」嘅藝人林曉峰近日就齊齊現身內地節目《超強音浪》。

型中帶Cute

喺節目入面，伊健大開金口，演唱咗幾首佢嘅經典名曲，兩個女主持聽完伊健唱歌之後，都紛紛大叫心跳加速，仲話見到一班小朋友圍住伊健嘅時候，好後悔自己咁早出世，睇嚟已為人夫嘅伊健，魅力指數依然爆燈！難得伊健上節目，一班主持人當然唔少得叫伊健重演一次喺戲中chok住行catwalk嘅場面，兩個女主持都睇到差啲流晒口水呀！除咗認真，當然唔少得搞笑啦，所以節目組就安排咗一啲道具畀伊健拎住嚟行catwalk，而伊健就揀咗一個奶樽造型嘅攬枕做佢嘅partner，chok得嚟又帶點可愛，認真搞笑！

觀眾嚇到呆

之後伊健仲講到戲中嘅幾個好兄弟，佢仲自爆：「拍完之後我哋從來都冇聯絡，亦都冇見面。」一班現場觀眾聽到之後都呆咗。伊健嘅其中一位好兄弟林曉峰亦都有到場，仲話自己帶咗同伊健「20年嚟嘅秘密」，不過呢啲嘅秘密其實係佢哋咁多年嚟一齊影嘅相，伊健一聽到林曉峰講佢哋五個一齊開演唱會嘅事，再加上林曉帶嚟嘅「秘密」，搞到伊健感動到眼濕濕，佢哋兩個之後仲一齊合唱《友情歲月》添！而節目組除咗剪輯伊健嘅粉絲對伊健深情表白之外，亦都安排咗一位粉絲上台送禮物，伊健睇見大家對佢嘅心意，都差啲流下男兒淚。

網民有話兒：

Exxxx-Axxx：太感動啦TT有咁好嘅兄弟真係不得了！！！！！

chlxxttxxxx：友情歲月呢首歌真係回憶！！！真係要再睇一次！！

ekinxxxxlo：鄭伊健真係愈睇愈有型！

GIVExxxxxx_xxx：完全係回憶呀。。。以前真係好鍾意睇！