鄭嘉穎48歲生日　陳凱琳煮愛心晚餐冧仔

型男鄭嘉穎與陳凱琳（Grace）自從喺2015年認戀後，感情一直好穩定。雖然兩人年齡相差逾21年，不過仍然冇影響大家之間嘅溝通，佢哋仲由拍拖初時嘅偷偷摸摸地約會，以至近年愈愛愈高調。話說今日係鄭嘉穎48歲生日，身為女友嘅Grace當然有畀驚喜冧男友啦！踏入凌晨，Grace就喺Instagram晒出一張晚餐相，並留言：「最簡單亦是最浪漫的 ❤️Happy Birthday❤️」唔使估都知佢係同嘉穎講啦！相中有兩碟帶子三文魚意粉，意粉隔籬仲擺咗兩隻酒杯，睇個布局就似係自家製晚飯嚟嘅。嘩！真係隔住Mon都覺得Sweet！網友見到後都紛紛向嘉穎送上生日祝福，仲有人留言讚Grace叻女添！

其實睇番Grace個Instagram，佢早前仲Post咗一段上烹飪堂嘅片，片中見佢仲煮咗薑蔥雞、大理石蛋糕、朱古力Mousse等甜品，款款都好似好正啵！唔知呢啲係咪全部都係嘉穎獨享㗎呢？