胡定欣犧牲形象扮狗乸：我係豁出去咁演

由藝人陳展鵬、胡定欣、陳山聰及姚子羚（Elaine）主演的無綫劇《同盟》打戲連場，集集高潮連場，既刺激又有搞笑元素，播出以來口碑不俗，監製文偉鴻剛在網上宣布喜訊，上星期四跨平台總收視最高高達27.4，並預告今晚再有充滿話題性的戲份，展鵬狼狽得褲浪穿窿，要搵手遮住重要部位；定欣犧牲形象扮狗乸；子羚及山聰則各自有以一敵眾的場面；易先生（歐瑞偉）亦會出手！

「搗蛋拍檔」定欣及展鵬今集要偷入廢鐵場，點知撞正內有惡犬，定欣諗屎橋扮狗乸冧狗公，但最後都搞唔掂，展鵬更被咬到褲浪穿窿，超級搞笑，定欣受訪時說：「成個角色都好好玩，好多好搞笑，我係要豁出去咁演，個角色行為好瘋狂，依家睇番都覺得好過癮！其實由上次《城寨英雄》開始咩都豁晒出去喇，做到都會做，我覺得有效果係緊要啲。」

至於山聰及子羚的打戲，山聰在停車場一打六，子羚則在車廂中一打四，劇情緊湊，山聰直言拍得辛苦：「場戲辛苦㗎，我打到濕晒！Elaine就仲慘啦，打完之後，兩隻手好似畀人家暴完咁，瘀晒呀！」