林佑蔚性感貼身舞辣「㷫」陳宇琛

藝人陳宇琛與前有線主播林佑蔚（Camille）繼年頭於牧師見證下舉行註冊簽字儀式後，日前一對新人便到英國愛丁堡一座古堡舉行童話式婚禮。雖然身在外地，但一對新人都有依傳統穿着婚紗、禮服外，都有穿着中式傳統結婚禮服。新娘Camille換了多套婚紗，當中有露背、露腰，亦有晒事業線，期間亦向姊妹團拋花球，場面熱鬧。婚宴中，Camille向坐在櫈上的老公陳宇琛大跳性感舞，不時搔首弄姿、撥頭髮、又扭腰又揈胸，意態撩人，之後更拉埋老公起身齊齊跳貼身舞，用屁股掃老公腿，之後「㷫」起的陳宇琛更除衫鈕想剥衫。

冇時候搞香港婚禮

Sam受訪時指雙方父母皆因工作而缺席：「今次婚禮大概四十人左右，識咗廿年嘅好朋友胡文新都有到，佢嚟之前都出咗幾次差、好攰，但佢都準備咗份講辭，搞到我眼濕濕好感動。」他又指婚禮前蘇格蘭連日落大雨，所以曾一度擔心婚禮受影響，好在婚禮當日天氣好好：「其實行禮之前都冇去過個古堡，一去到嗰時都覺得好童話。（你老婆向你跳辣身舞？）我都好Surprise！其實老婆一路都有跳開舞，不過近年做嘢少跳咗，甚至我都冇見過佢喺我面前跳。佢好犀利，忙於工作之餘仲要搞呢個婚禮，又要私底下練功。（你事前唔知？）其實都估到啲，但冇諗過個舞咁完整。」他又指自己與老婆一回港便投入工作，搞到未有時間籌備香港婚禮，目前首要任務是搞好新屋裝修。