薛家燕有病都要開工：我唔做邊個做

藝人薛家燕現身將軍澳電視城為節目《流行經典50年》錄影，性感舞衣令人眼前一亮，她透露將與葉振棠合唱一曲：「收到歌都只係練到兩日，首歌都幾難，要棠哥就番我個Key。」

講到主演的新劇《燦爛的外母》即將播映，薛家燕笑說：「應該係近年最快上嘅新劇，拍完兩、三星期就上，自己都緊張嘅，因為主題曲都係我唱嘅，錄音時病咗聲沙沙，珍姐（曾勵珍）話我把聲做《流行經典50年》時都唔係咁嘅？就叫我再錄過，咁當然係冇問題啦！不過首歌係有難度嘅，歌詞又快又密！」

薛家燕表示近日忙為劇集配音及宣傳：「一日做咗七個訪問！我都從未試過。最近都好忙。學校嗰邊仲要做匯演！（仔女有冇叮囑你注意健康？）都有呀！（有冇聽話？）但人在江湖身不由己囉！囡囡都病埋，我唔做邊個做呢！」