唐詩詠老銅先插旗　搶敏之頭啖湯做餅后

娛樂圈很多藝人都有投資生意，更有不少做埋生招牌搶客，而曲奇及蛋糕這些老幼鍾愛的美食更成熱門生意，除了謝霆鋒、古巨基、陳敏之、謝寧於港島區開店外，連唐詩詠、黃婉曼、鄭欣宜都紛紛進軍銅鑼灣餅業巿場，齊齊爭做「餅后」。

唐詩詠就以老闆娘身份出席有份投資、位於銅鑼灣的餅店開幕禮，更即席瞇眼試蛋糕冧客！諗頭多多的詩詠接受東網訪問時坦言，想過Rap段Freestyle為餅店谷人氣，她又表示親身飛到北海道學整蛋糕，一於親力親為。問到是否賣完蛋糕買磚頭，她說：「可以就梗係最好啦！都朝住呢個目標去。」

靚媽歡迎良性競爭

而「曲奇天后」敏之現時於港、澳兩地已有六間分店之多，店舖遍及金鐘、尖沙嘴、天后、旺角等地，生意不俗，靚媽敏之更親身上陣為其品牌月餅拍攝廣告硬照，不諱言曾打算於銅鑼灣開店：「依家雖然忙住湊仔，不過我都會盡量抽時間打理生意，親力親為，依家各間舖嘅生意都愈來愈好，之前我一直都有留意銅鑼灣啲舖位，睇過好多次，蛋糕生意真係要睇啱先得，各樣嘢要配合，自己天后有舖，所以都唔急，我都有計劃做埋蛋糕、麵包，不過工場方面都係問題，所以要一步一步嚟，等我忙埋月餅先！」

談到詩詠搶頭啖湯開蛋糕店，敏之笑說：「冇所謂，我主打係曲奇，味道都唔同，我都好支持佢，我化妝師都有買咗詩詠嘅蛋糕嚟，我都有試過，大家交流吓，以前古巨基開曲奇店，我同佢太太都有交流心得，大家各有各做，有良性競爭係好嘅！」