潘伯仲醫院探病啟發靈感作新歌

20170819
東網電視
更多新聞短片
Anson嘅新歌以病人做主題。

歌手潘伯仲(Anson)最近推出咗新歌《我是病人》,更邀請到周耀輝擔任填詞人。接受訪問時,Anson透露去年婆婆患病需要住院,所以當時經常出入醫院,深切感受到老去係必然,但又唔可能逆轉,係個好殘酷嘅現實,而啟發靈感去創作新歌。提到點樣促成同耀輝嘅合作,Anson笑言因為歌手王嘉儀嘅填詞人係耀輝學生,所以巧合地取得耀輝電郵,而膽粗粗傳電郵聯絡對方:「一直都好欣賞耀輝嘅詞,本身都諗住唔會有回覆,但好彩耀輝都對『病人』呢個題材有興趣!」

講到新歌主題圍繞「病人」,Anson同耀輝坦言大家都分別發生過意外,而需要做手術將鋼針鑲入身體裏面,令創作上更有共鳴。兩人表示新歌除咗講患病嘅人,同時係描述大家都生存喺一個病態嘅社會入面,耀輝話:「肉身嘅脆弱比較容易感受得到同治療,但心靈上嘅脆弱就算知道都未必能夠治療,呢個社會好病態,殘缺好多人都有,但冇人擦覺到,同承認呢件事。」其後,Anson指起初以為要等好一段時間先可以收到耀輝嘅詞,笑言:「耀輝好快就畀咗份詞我,見到好詩意嘅歌詞好開心,完全係自己想要嘅嘢,不過有啲唔明歌詞嘅意思,都要有請教番耀輝。」另外,耀輝亦大讚Anson年輕有為,所以希望用自己嘅能力,去鼓勵年輕人去勇於追尋理想:「走啲唔係人哋覺得你應該走嘅路,做自己想做嘅事,社會就會活潑啲同多元啲!」