MV360度狂轉係特登　Tommy自認夾硬Rap

「MK Pop始祖」E-Kids相隔14年後再出新歌《一二三四》，佢哋嗰首自稱投資咗六數位，喺旺角要封街拍攝嘅MV終於面世，雖然網民有讚亦多彈，但短短一晚時間，瀏覽E-Kids嘅官方page高達21萬多次，而MV瀏覽都有5萬7人次，「MK Pop始祖」威力係「犀飛利」。睇番啲留言，不少網民轟MV鏡頭不停360度轉，睇到頭暈又想嘔，同埋質疑MV唔知拍乜，話佢哋花幾十萬拍個MV，錢使在那裏？

讚定彈都接受

E-Kids成員Tommy（阮民安）接受東網訪問時表示：「無論網民係讚係彈，我哋都會接受，啱嘅會會心微笑，唔啱都係會接納，每個人都有唔同立場同意見，好似有啲人鍾意港女、有啲鍾意姐姐，有啲就鍾意外籍女仔咁啦。」

360度轉配合首歌

至於為何鏡頭轉到頭都暈埋？Tommy就話係刻意營造嘅效果，佢話：「個鏡頭不停咁360度轉係特登嘅，想營造電子同迷幻嘅感覺配合番首歌嘛，我覺得咁拍好配合首歌，係我哋嘅原意構思嚟嘅。」

掟錢落海

問到製作費花在那處？佢咁講：「封咗條街，加咗好多LED燈、仲有大量道具，我哋同舞蹈員啲衫，最重要係我哋研發咗一部機器拍攝，香港咁少快歌，係因為拍快歌MV係掟錢落海，全部都係錢嚟㗎，我哋唔想好似音樂節目，歌迷全程企喺度唱足三分鐘歌。」

唔想改任何一粒音

有網民批評「唔知Tommy唱乜」，佢就解釋全因廣東話太難發音：「首歌係我作嘅，搵日本音樂人編曲，再畀少爺占作廣東話詞，因為廣東話發音好難，有啲詞同曲係唔夾，係我夾硬塞落去Rap嘅，因為我唔想為就啲廣東歌詞而改我作嘅任何一粒音，我有我堅持。」