C君出手!影到鄭裕玲有少女味

20170820
東網電視
更多新聞短片
鄭裕玲同農夫去咗丹麥拍節目,今次仲加入馬明添。

藝人鄭裕玲(DoDo)同農夫之前一齊拍嘅節目《Do姐去Shopping》就非常受歡迎,唔少觀眾都話佢哋合作好有火花,總之就係正啦!今次《Do姐再Shopping》當然就唔會少得農夫佢哋,而近日佢哋就齊齊到丹麥拍攝,今次仲要加埋男神馬國明(馬明),聽到呢個組合已經非常吸引。去到丹麥當然就會影唔少靚相,呢日C君就喺社交網上同網友分享佢為DoDo同馬明影嘅相,仲話:「並唔係我影得佢型,係佢真係型,一理通馬國明放假一天。」相中就見到馬明唔使擺任何甫士,齋企喺度,都已經chok爆,而張相仲要校到變咗黑白色,真係好有feel。另外一張相,就見到紮咗辮嘅DoDo企喺樹旁,展露佢招牌嘅笑容,散發着少女味道,一樣咁正,難怪C君都話:「嚟一張充滿少女情懷嘅Do姐 !」

另一邊廂,DoDo都喺社交網甫咗四人嘅合照,網友都話簡直係靚人靚景,仲話好想睇快啲睇到佢哋嘅節目呀!