絕對冇喬裝！周家蔚公開素顏靚樣教化妝

唔少做咗媽媽嘅女藝人，都好鍾意用社交網站玩直播同大家分享生活，呢次就輪到兩子之母嘅周家蔚喇，今次佢就直播教大家化妝！一開波周家蔚就唔怕素顏見大家，望落去冇化妝嘅佢，皮膚零毛孔，真係令人好羨慕呀！

直播開頭仲見到周家蔚老公洪天明突然喺後面入鏡，雖然就未有見樣，不過佢都問吓老婆搞緊乜，見到周家蔚好溫柔咁話自己開緊Live，真係睇見都覺得好恩愛！好，都係入番正題先，成個直播都見家蔚好溫柔咁邊化妝邊同大家傾吓偈，唔少網友都話其實周家蔚妝前妝後都唔係太有分別，上妝嘅佢只不過係有顏色同精神，完全都唔係妝前妝後兩個樣！

化化吓，天明又再出場，今次仲化身暖男兼好老公，話一陣一家人食個飯，仲走入廁所幫周家蔚拎假眼睫毛添，之後見到老婆化妝咁忙，又代老婆叫囝囝準備換衫出街，令到周家蔚可以安心繼續化妝！之後又到細仔JT亂入，又喺度問媽媽做緊乜，仲攞住個化妝掃扮化胭脂，非常搞笑！唔少網友都讚周家蔚個妝夠自然，仲叫佢開多啲Live同大家互動吓，大讚佢真係好親民呀！

網民有話兒：

xxrixxxne Cha：你唔化妝都靚

Jxxy So：你好靚及斯文，很喜歡你，會否考慮live落妝？

Vxxta Lxm：化得好靚啊

Sxn Yu Wxxg：仔仔好得意