做KOL？袁文傑孖女友拍片搵銀

藝人袁文傑到灣仔出席電腦通訊節活動，首次為傑出數碼品牌大獎擔任頒獎嘉賓。他自爆最近學剪片，自己拍攝和加特效後放上網：「幾好玩，自己拍就知導演嘅要求。（拍咩？）訪問、角色扮演。唔好意思，我又講波，之前我戴晒阿仙奴球員嘅面具，扮唔同人講唔同嘅嘢，砌埋一齊做條片。（有冇影女友張潔蓮？）佢有時都嗲吓我，話『影吓我啦』，都要啦。」

他透露即將第一次與女友合作搵銀，笑言難得大家「撩番起」二人。問到是否影婚照？他說：「太正路啦，我哋會拍啲嘢。佢煮嘢食幾叻，教小朋友，好多家長好鍾意佢。（做煮食節目？）分分鐘好搵過我，個市場好大，我抆住佢搵錢，不過未正式，但網絡世界鍾意點玩都得。」他笑指兩人的酬勞與自己的計法當然不同。至於可擔心有拗撬？他表示未開始合作：「洽談中，不過我諗冇嘅，我同佢從來冇乜，我就得佢，佢又就得我。」