入行結婚乜都得!梁家輝驚阿女一世唔嫁

20170826
東網電視
更多新聞短片
梁家輝「乜都唔反對」,因為阿女已經係成人,條路係佢自己嘅!
影帝梁家輝與太太江嘉年及大女梁穎晨(Chloe)現身車行開幕並擔任剪綵嘉賓,家輝坦言今次是首次做剪綵嘉賓,他解釋:「今日好例外,平時好少出呢啲場合,因為車行其中一個老闆係我嘅世姪,由細睇到佢大,佢同朋友創業,喺香港創業唔易,尤其做車房,佢哋咁年青,將自己嘅事業放喺車房好值得鼓勵,佢哋唔係向錢看,見佢哋對車好愛錫,又對車好有認識,希望香港年輕人學佢哋,唔好自怨自艾。我冇乜嘢送畀佢哋,下星期攞架車畀佢哋整。(今次免費剪綵?)唔係講錢,見到後生仔好值得鼓勵。」
由阿女自由發揮
問到家輝有否試過創業,他坦言從未,笑言:「我創造咗自己事業同家庭,已經好叻,喺自己專業上賺自己生活。我好早就知道自己唔係做生意嘅材料,每個人都要認清自己嘅專長,唔係人去炒金你又去,唔好盲目去跟。」提到早前大女Chloe拍廣告,是否會入行?他否認:「佢冇同我講過會入行,佢拍廣告係幫朋友。(佢有冇潛質入行?)要畀佢試吓先知,唔係佢想入行,我就幫佢,要佢試過先知自己得唔得。(你反唔反對佢入行?)我乜都唔反對,就算佢話結婚生仔我都唔反對,呢個係佢條路,而且佢都係成年人,佢都大學畢業又出咗嚟社會做事。(恨唔恨個女快啲結婚?)如果佢搵到個鍾意嘅人我冇所謂,但唔應該為結而結,要搵個付託終身嘅人。(會唔會唔捨得個女?)佢結婚又唔係我結婚。有好多人以為仔女結咗婚就會冇咗個仔女,如果你對家庭信任,你係唔會冇咗個女,而係多咗個仔,如果個女一世唔嫁,死跟我,我都好心噏,如果佢組織到個家庭,我都會戥佢開心。」
爛面造型保密
談到近況,家輝稱仍在拍攝由麥浚龍導演的電影《風林火山》,稍後要到深圳及馬來西亞,預計拍到十月中,問到戲中的爛面造型?他稱不能透露:「總之只可以講,我會打死晒所有人,我要留守到最後,雖然辛苦,但好開心。」