66歲元華紐約晒中國功夫　五樓吊威吔

「七小福」成員之一的武打影星元華，為了拍攝電影《唐人街探案2》去咗紐約。日前，佢喺當地唐人街拍攝一場吊威吔戲，呢場戲真係唔惹少，見到着住白色唐裝衫嘅元華，被吊高到五層樓，吸引大批市民圍觀，見到都腳仔軟！

曾經是李小龍御用替身有觔斗王之稱嘅元華，雖然已經66歲，但見慣大場面，對於呢類鏡頭簡直濕濕碎，見佢從天而降，着地後面不改容演戲，拿着摺扇潑吓潑吓，好淡定，型到裂！唔使埋位時，元華有專人服侍幫佢按摩鬆弛吓，電影公司劇組人員真係唔話得喇。

至於同場仲有大陸影星王寶強，早前佢嘅離婚案鬧得熱哄哄，現場見佢只顧拍戲，甚少交談。