【開學親子樂】陸永孖囡囡玩雙人呼拉圈

藝人陸永育有一對可愛嘅小寶貝Hannah同Simsim，兩個囡囡同爸爸一樣表演欲甚強，表情多多深得網民歡心。今日係開學日，陸永就趁住唔使開工陪咗大女Hannah返學，真係父愛洋溢呀！

之後，陸永喺社交網上載咗同Hannah喺學校嘅片段，並留言話：「開學日即興親子才藝表演。」才藝表演？玩咩呢？片中見到陸永同Hannah玩呼拉圈，但最特別嘅係兩父女玩埋同一個呼拉圈。企喺前面嘅Hannah就梗係開心啦，難為爸爸要張開對腳企就番個女嘅高度，又唔敢太大動作怕整親個女，但陸永又玩得好投入，簡直父愛出晒嚟呀！