曾因肥胖遭打撃　詠詩：用把聲感動人

歌手詠詩將於10月14日假伊利沙伯體育館舉行處女「詠詩Vincie in concert」演唱會，日前她在恩師區瑞強陪同下接受訪問，兩人即場Jam歌顯默契，區瑞強透露認識詠詩多年，他說：「過去7、8年演唱會都搵佢做嘉賓，近年仲成為我音樂會樂手添。」隨即大讚對方說：「佢好有才華，睇住佢成長，進步神速，佢都唱咗十幾年歌，都係時候開演唱會。」

用心做音樂

詠詩身材媲美同是唱家班的鄭欣宜，問到有否因肥胖外形被打撃自信心？詠詩說：「曾經喺討論區畀人話我身材，初時係有唔開心，之後諗番，我係用把聲去感動人，最緊要用心去做好音樂。」擁有一班知音歌迷的詠詩坦言歌迷給予不少信心，她說：「我點唱都總會有人欣賞，有歌迷同我講，佢唔開心聽我唱歌就舒服晒，好多嘢睇你點睇。」

唔認係經理人

區瑞強表示詠詩是時候開個人演唱會，說：「佢唱咗十幾年歌，亦都同好多歌手合作過，音樂經驗唔使擔心。」並否認是詠詩經理人，區瑞強說：「好憎做經理人，知道藝人心態，好多時會因為利益衝突搞到不歡而散，我真係冇為佢之後條路計劃。」