經典！李克勤話唔知點解自己叫「送禮勤」

歌手李克勤一連9場《李克勤慶祝成立30周年演唱會》於紅館開鑼，當介紹live band樂手嘅時候，螢幕播出由足球評述員蔡育瑜配音，更以球員喺出賽前嘅形式嚟介紹樂手，最後仲話：「有請足金金猴李克勤！」接着，克勤就同一班dancers跳唱《球迷奇遇記》、《Victory》及《護花使者》，期間克勤仲喺降台彈上嚟，更被dancers抬起，獲全場歡呼尖叫。之後克勤笑言：「呢個姿勢有型呢？你知我跳舞要排好耐，我排咗兩次都算係咁啦！今次仲將足球融入，咁多年嚟足球帶咗好多嘢畀我，仲多咗個花名，唔知點解，不過冇所謂啦。最近有人同我講你隊波好勁喎，踢咗3場都贏，1球都冇輸過，我都唔知幾時曼聯變咗我隊波！」

去到encore，克勤就換上粉紅色閃爆睡衣look上台，更自嘲30幾年都被撥入唔識着衫嘅類別：「老實講我唔太介意，我唱歌OK啊！」雖然太太間中都會幫自己襯衫，但始終都係被認為唔識着衫，所以今次就邀請到黃偉文做形象指導。當適逢七月十四，踏入11點子時，克勤見到有四個吉位，就笑言：「係走咗㗎咋？定係我見唔到？你知呢幾日㗎啦！」全場爆笑。最後，克勤就唱出《愛不釋手》為演唱會劃上圓滿句號。