十二隻恐龍去野餐！譚偉權冧唱Acoustic版

「十二隻恐龍去野餐，齊乘坐旅遊車出發了......」相信身為80後嘅你，都一定有聽過呢首由譚偉權（Gary哥哥）主唱嘅經典兒歌，好多人仲以為呢首歌叫《12隻恐龍去野餐》，其實原本係叫《白石嶺公園》呀！以前好多小朋友一聽到呢首歌就會同媽咪講好想去野餐，點知到咗今日，呢首歌可以當情歌咁唱喎！

話說無綫劇集《燦爛的外母》熱播當中，呢日myTV SUPER上載一條名為【燦爛的外母． 12隻恐龍去野餐（獨家MV）】嘅短片，呢幕原本講SM王（黎諾懿飾）想追番嵐嵐（湯洛雯飾），成個意境夠晒浪漫，咁背景音樂當然要配上Romantic情歌啦，點知呢個時候Gary哥哥出場，仲同SM王講：「我唔係想葡萄你，你唔好以為自己高大威猛就一定食硬你女朋友......」下刪一百字，總之Gary哥哥就覺得有膊頭嘅，就應該花啲心思追番嵐嵐，咁SM王當然如夢初醒啦！

呢個時候Gary哥哥就開始自彈自唱《白石嶺公園》，而且仲係重新演繹嘅Acoustic版本，佢邊彈邊唱嘅同時，有幾隻恐龍仔喺畫面度跳嚟跳去，夠童真得嚟又真係幾Sweet嘅，仲令好多聽呢首歌長大嘅80後啲回憶返晒嚟，真係要多謝Gary哥哥呀！網民都留言話估唔到「12隻恐龍」都可以變成「愛情邱比特」，連真Gary哥哥都化身做星級網民留言：「哈哈哈哈⋯⋯好Romantic呀！」係愛呀哈利！

網民有話兒：

AXX Li：好好聽呀！搵次野餐播下（吓）都好！

KiXXy Wong：回憶返晒嚟呀！！！❤❤❤

Miu TXXg：不如播埋昨晚的原裝版本比大家欣賞吧，Gary原創的「錯過的愛情」。

Lee YXX：我細細個就聽12隻恐龍