譚耀文化身Rambo 子彈擦唇流血收場

20170907
東網電視
更多新聞短片
好專業呀!

藝人譚耀文、梁琤、唐文龍及樂團主音兼盧巧音老公蘇浩才(Sammy)等,日前雲集將軍澳為黃永峰監製的新戲《辣警霸王花2》拍攝槍戰場面。當天正打風兼天氣相當酷熱,台前幕後到場不久已大汗疊細汗,相當辛苦。為營造迫真的槍林彈雨效果,電影公司事前已向相關部門提出申請,以真槍發射空彈拍攝「實戰」場面。

導演一聲令下,手持M117型號長槍的阿譚即「Rambo上身」,偕同唐文龍等與「匪徒」Sammy展開駁火,立時槍聲四起,期間因子彈殼及玻璃碎片交叠橫飛關係,意外擊中了當時正全神貫注的阿譚唇部,但為了不想影響大家的拍攝情緒,他忍痛完成餘下的拍攝工作,直至停機後被發現唇部滲血,工作人員即取出藥物膠布為阿譚治理,結果被大讚專業。阿譚受訪卻笑謂:「好小事啫,都冇大礙。大家可以放心,電影公司有幫我買保險嘅。」

阿譚對今次演出相當重視,細節如角色名字,他都花盡心思:「我好鍾意呢個角色,連角色名都係我改嘅,事關編劇起初冇交代我叫咩名,淨係話我係『譚Sir』,但有場戲講我要介紹自己,我就幫自己改咗叫『譚家明』,一嚟我好鍾意我哥哥個『明』字(譚耀文哥哥譚耀明),二嚟譚家明導演執導嘅《父子》好經典,惟有借用吓導演呢個咁靚嘅名啦。」談到今次扮演正義凜然的警長,與以往扮演奸角深入民心可謂截然不同,阿譚坦言最緊要觀眾喜歡,他又笑說:「嚟緊接咗幾部戲,會花多啲時間留返喺香港,最開心係可以陪多啲屋企人嘛。」