感激連詩雅包容　鄭融匿埋自己喊

歌手鄭融與連詩雅（Shiga）在麥花臣場館舉行演唱會尾場後受訪，早前被直髮器燙傷腰部的鄭融指傷口結焦的範圍大：「所以唔想郁佢，佢前日先甩，塊皮好脆弱，唔想用化妝品遮住佢，驚唔好。但唔遮就好多人問我係咪敏感，今日就用咗透明膠布遮住先。」她坦言很開心順利完成，Shiga則覺得時間過得太快：「本來好多擔心同憂慮，去到Show Day又好唔捨得。」鄭融笑言正按捺自己的情緒，通常沒有人才會哭，但其實心中很感動：「好難得同另一個歌手做演唱會，上天安排我哋一齊做，我每一刻都好感恩同珍惜，係令自己成長嘅過程，佢包容咗我好多嘢，我係蝦碌人。」

Shiga認為她們是互相包容，因為自己不夠經驗，很多事不懂面對：「阿融畀好多意見我，提點我有咩要注意，好多謝佢。（頭先忍唔住喊？）我每一次可以踏上舞台都會特別感動，諗起係咪好多人唔鍾意我，但我都仲有機會企喺舞台表演，應該好感恩，咁我就會好激動。（緋聞男友徐浩冇拎紙巾畀你？）係咩？可能佢忙緊，我陣間會講吓。」鄭融表示會向公司爭取再次合作，例如唱合唱歌及到海外巡演：「希望可以啦，咁多心機放喺入面，有得重做梗係開心。」Shiga指這次的環節很豐富，只做兩晚很浪費。