預告缺席頒獎禮 祖兒超額完成一生責任

20170911
東網電視
更多新聞短片
容祖兒坦言已經超額完成了一生要做的事:「我都隨遇而安去面對工作。」

天后容祖兒於《IFPI香港唱片銷量大獎2016》上共奪得5個半大獎而成為大贏家,當中包括「十大銷量廣東唱片」、「十大銷量國語唱片」、「全年最高銷量本地女歌手」、「十大銷量本地歌手」及「全年最高銷量本地現場錄製音像出品」,還有與李克勤一同奪得的「最暢銷本地現場錄製音像出品」等,至於英皇得獎歌手還有張敬軒、林峯、Twins、李克勤共奪得16個獎項。

面對工作隨遇而安

祖兒多謝大家支持,對於這是今年頒獎禮的好開始,祖兒竟說:「其實我今年冇歌,我一首歌都冇,就算我出席都係純粹支持,我都有等緊歌詞,如果有都會出歌嘅,但我都唔係諗住去角逐爭第一嘅心態,反而係如果我有時間,我去支持嘅話,我會好開心去戥我啲朋友攞獎嘅。(預早講定唔出席頒獎禮?)早啲講定嘛,唔係一陣你哋(記者)又問。但今日攞獎就開心嘅!」

如果不出席領獎,歌迷會擔心祖兒很多獎項不能連任而斷纜,祖兒解釋:「首先又唔覺得連任係必定做嘅事,亦唔係一個健康嘅現象,對大家嚟講都想戥我開心,我都好多謝,但如果樂壇有更好嘅、更值得攞獎嘅,咁佢哋得到獎,我都會好高興。對我嚟講,我條件已經超額完成咗我一生要做嘅嘢,我都隨遇而安去面對工作。」

爆阿Sa愛得甜蜜

談及結婚,祖兒說:「諗吓先啦,呢啲嘢又唔係Must(必須)嘅!」問有人求了婚?祖兒連聲說:「冇冇冇……唔好無啦啦講呢啲無謂嘢!你哋提議嘅嘢,要慢慢諗清楚先啦!要慢慢思索。」

提到之前和蔡卓妍(阿Sa)去杜拜旅行,阿Sa有晒全身比堅尼相,為何祖兒未有?她笑言:「 其實阿Sa跳起嗰張相,我係喺隔籬一齊跳,不過我叫佢Cut咗我,唔好Post出嚟,每個人呎度唔同,最多私影畀你哋睇。」

旅行期間可有和阿Sa談及她的男友,祖兒表示:「佢好開心嘅,睇到佢容光煥發!(阿Sa有冇成日報到?)有視像!(正式介紹咗你識未?)我哋識咗啦,我哋閨密嚟嘛!我可以講係阿Sa有帶紙巾出街吖!(即係點解?)有人提佢,有人塞咗包紙巾入去呀!我講呢啲算有交代啦!」