自組公司升呢一姐　欣宜：畀我享受吓！

歌手鄭欣宜現身電台，受訪時她表示很開心終於可以公布自組公司的消息，她謂：「呢3年同蕭定一合作開心，佢好錫我，佢喺自己唱片公司裏面開一條line畀我，叫做Passionfruit Records。」

希望繼續成長

講到她做老闆，欣宜先搞爛gag話自己「我是歌手」，之後就謂：「無論唱歌事業定係做（曲奇）生意都好，有機會嚟到我就想抓緊，唔想將來後悔，當佢係學習經驗，今年係入行9年，出年10年，希望嚟緊20年、30年都可以有不斷成長嘅空間。」

講到成為「一姐」，欣宜笑言：「幾陰公，要自己開公司先可以做一姐，我有同許廷鏗講過呢個笑話。（會唔會簽其他人？）冇諗過，可能都係3、4年後先，畀我享受吓做一姐，雖然公司得我一個。」講到她簽男藝人就不怕影響到一姐地位，問可會簽好友許廷鏗？她笑言：「嘩，佢依家係一哥，佢唔會郁㗎啦！（佢喺你呢到都係做一哥。）可以諗吓嘅。」

感激蕭定一

而講到有指蕭定一豪擲千萬幫她開公司，她避談謂：「佢真係好好，我今年都有少少衰，直至今日先推出新歌，佢真係好肯畀好好配套我。」問到她可有自掏銀包開公司？她仍然避談：「總之阿一真係對我好好，我都對佢好好，最緊要合作開心。」問到自組公司是否彈性大了？她表示：「阿一一直畀好大自由空間我，依家可以繼續同自己班底工作，阿一都畀我揀幕後嘅teammate，今日同我出嚟宣傳嘅兩位同事都係阿一畀我決定，真係好開心。」問到爸爸鄭少秋可有送上甚麼禮物賀她成立新公司？她謂：「唔知喎，佢忙緊澳門演唱會，但如果佢想送個旅行畀我都冇所謂。」