東方日報C1:卓林輟學離家!吳綺莉感無奈
吳綺莉與囡囡吳卓林關係再起變化!卓林最近不但離家出走兼輟學,更與外籍同性密友同居!兩人日前更被發現轉私竇,「升呢」搬到私人屋苑,游完水仲公然煲煙回氣!吳綺莉對此直言囡囡快將成年管唔住,身為人母卻只能無奈表示:「當佢去咗生活體驗!」

單親媽媽吳綺莉(Elaine)和囡囡吳卓林今年年初因交友問題發生爭執,其後卓林入院留醫兩個多月,期間Elaine在記者會中壓力爆煲聲淚俱下求女兒回家,最後Elaine守得雲開,卓林重投母親懷抱之餘,更稱從來沒有嬲過她,兩人和好如初,事件亦告一段落。不過,母女關係最近卻再度出現變化,據知卓林停學期間,Elaine依然每個月付17,000元為囡囡在國際學校留位,可惜卓林早已厭倦學校生活,有見及此,Elaine安排她在家學習配合其需要,但卓林始終無心向學,最後更輟學離家出走!

天台聚腳吹水

一直與外籍同性「網紅」密友A小姐過從甚密的卓林,離家出走後,更正式搬入對方的灣仔舊樓中同居。她們間中會走出溫馨「蝸居」到區內吃喝玩樂,有時更會約三五知己走上天台「Chill一Chill」,在鬧市中的「小天地」食煙吹水飲啤酒。本報記者就發現有次她和兩位女友人在天台邊緣危坐,睇落相當牙煙,事後她們亦遺下煙頭、玻璃樽等垃圾。

最近,本報記者發現卓林與外籍同性密友轉私竇,從灣仔舊樓搬到私人屋苑,更在剛過去的星期六早上11時許被拍得兩人在屋苑會所出現。當時,她們均上身穿着運動Bra Top、下身包住毛巾,在會所游泳池游完水後,頭髮仍然濕透的兩人步出會所門口點起香煙,並坐在旁邊的石壆上吞雲吐霧。約五分鐘後捻熄煙頭,走到屋苑其中一座住宅大樓地下準備上樓,行前面的卓林以純熟的手法撳密碼,相信她已在「新竇」住了一段不短的日子。

記者致電Elaine跟進她與女兒的關係,問囡囡是否離家出走?她語帶無奈說:「其實佢冇喺屋企住一段時間,我同佢一直有保持聯絡。佢11月就18歲,都好大個,唔可以吓吓都管住晒。(知佢搬咗去私人屋苑?)我自己就冇朋友住嗰度,但唔知佢有冇朋友住嗰邊,所以佢知密碼都唔出奇。」提到卓林輟學,Elaine卻有另類想法:「學習唔一定要返學嘅,佢有同我講佢依家教小朋友普通話,咁呢種都係一種生活體驗嚟,主動去工作係好事嚟,總好過溫室生活。」

提供基本生活費

問有否向卓林支付生活費?Elaine稱有提供基本開支:「應該要畀嘅都有,但唔多。(幾千蚊?)總之應畀則畀,佢咁大個都應該要學點樣自己生活。」面對囡囡決心離家,Elaine作為母親只能無奈接受,又強調屋企大門永遠為女兒而開:「鍾意幾時返就幾時返,阿媽我永遠都會歡迎。我哋都有聯絡嘅,又生活喺同一天空下,個心係連住嘅,惟有當佢去咗生活體驗。」

更多新聞,請瀏覽東方日報網頁:
http://orientaldaily.on.cc/