【超洗腦】王祖藍惡搞吳若希唱咖哩魚蛋

由王祖藍策劃兼主演的無綫劇集《老表，畢業喇！》快將播映，而劇中會多次播出一首歌，亦是祖藍搵着吳若希來惡搞，將吳若希膾炙人口的歌曲《越難越愛》反轉再反轉，炮製了為食版《越辣越愛》。歌曲除了密集式以只有四個字嘅歌詞「咖哩魚蛋」同大家洗腦外，祖藍飾演嘅《老表》代表人物蔡芯，亦會以「蔡芯若希」LOOK上陣拍攝「動人」MV，不單止有飄逸感，祖藍更縮埋扮BB甫士，連MV海洋背景都抄到足，只是海入面飄來飄去的布變成了咖喱魚旦同湯汁。而整個MV最令人忍俊不禁的地方，是祖藍唱歌時扮陶醉嘅樣勁頂癮，仲一邊唱一邊嘔泡泡。

問到為何會惡搞吳若希時，祖藍笑謂別無選擇：「TVB冇乜其他歌可以有版權，而我又熟嘅。（點解會淨係填四個字落去啲歌詞度？）其實靈感係嚟自《雞全部都係雞》，我覺得好無聊，好好笑，咪照辦煮碗。多謝導演同監製，佢哋追求得好細緻，我只係要求盡量似番吳若希原本嗰個版本，將啲水變成湯同埋加啲咖哩魚蛋落去，全部都係導演同埋台前幕後嘅功勞。」問到會否驚吳若希嬲時，他謂：「我唔驚佢嬲，佢抵抗力好強，點玩佢都冇事，佢分分鐘仲玩埋一份添，我都好期待有一日可以同佢合唱呢隻歌。」