雙喜臨門！李晨求婚成功范冰冰感動落淚

9月16日正是內地女星范冰冰36歲的生日，不過今年呢個生日就真係好特別，因為男友李晨喺呢一日求婚成功，真係雙喜臨門！

凌晨時段，內地男星李晨喺微博甫咗幾張為范冰冰慶祝生日嘅相，開頭睇以為同往年一樣冇乜特別，細心啲睇，其中有一張竟然係李晨單膝跪地手持戒指向范冰冰求婚嘅照片，再認真啲睇范冰冰眼泛淚光感動落淚，李晨留言表示：「我們，永遠…」而范冰冰亦極速轉發李晨呢個甫並寫上：「永遠，永遠…」佢哋兩個神同步真係夠晒恩愛！

范冰冰同李晨拍拖兩年以來，人前人後一直非常恩愛，之前接受訪問佢哋都講過視對方為結婚對象，不過李晨一直未有求婚動作，期間仲流出過分手傳聞，唔少粉絲一直表示好擔心希望佢哋可以修成正果，今次李晨公布求婚成功，相信一班粉絲一定安心晒，呢個求婚成功宣言甫一出，短短一個小時就已經有15萬人點擊讚好！