撞樣！傅穎反串男女都得雌雄莫辨

近年專注在內地發展的藝人傅穎（Theresa），日前返港為藝人海俊傑與其化妝師太太婚禮做伴娘，她說：「我同佢哋兩個都熟，我哋喺北京認識，合作過，但唔多，但平時我哋會食飯見面。（見到人哋結婚有冇心郁？）暫時未係時候，（你唔想生BB咩？）結完婚先生，我會好好保養?己。」

與蒙古男友聚少離多

跟蒙古男友拍拖差不多三年，因為工作關係，她與男友在內地經常走來走去不同地方，她坦言兩人見面時間不多，是否很難維繫感情？她說：「好難講，好多人都會希望兩個人可以成日一齊，但唔到自己話事，有時我去探佢，佢又會嚟探我，見唔到就專注自己工作。」

男友不存在？

她的蒙古男友從未曝光，有人懷疑她的男友是否真的存在？她笑說：「唔通係空氣人？我完全唔介意大家點去估，我唔想過度消費一段感情，講得咁巨細無遺，講太多好無謂，因為今日唔知聽日事，將來結婚我會公布，因為都瞞唔到。（依家同男友感情點？）同之前一樣見得唔多，但都OK。」本月22日是傅穎的生日，她表示屆時將身在上海或北京，問男友可會給她驚喜？她說：「我冇期望要啲乜，今年未知會唔會一齊慶祝，但舊年有一齊過。」

反串與男神撞樣

最近傅穎拍攝了一系列宣傳照，其中一輯她戴上假髮扮男生，亦有輯露背晒性感，她將反串照放上微博，有粉絲指她造型跟人氣男神鹿晗撞樣，她笑說：「佢靚仔好多，我睇過佢套劇，真係好靚仔，我將相放喺朋友圈，又有人我似GD。」她曾在古裝劇反串，不少劇組人員指她扮男裝比女裝好看，她笑說：「唔知開心定唔開心，但都好，多一條戲路。（男友喜歡你扮男裝？）佢一定話點都好睇，唔會有第二個答案。」談及裸背照，她笑言並非真空上陣：「我有戴Nude Bra。（有信心露背多過露前面？）最好唔露，密實啲會有信心啲，我一向畀人感覺唔係性感。」