入行25周年開騷 湯寶如唔想再出意外
歌手湯寶如(湯記)為11月15日假九展舉行的「湯寶如獨愛音樂25周年演唱會-香港站」舉行記者會,問到可會加場?湯記謂:「未知,我嘅原意係做一場,因為做一場都要花好多氣力,加唔加場睇吓自己心情啦,本身自己係冇諗過今年開騷嘅。」湯記表示是公司覺得今年是她入行25年,她笑言:「對我嚟講數字唔係咁重要,我反而諗住今年做歌先,明年先開騷。但咁啱公司話有期就做。(周慧敏都開30周年騷。)佢應該做埋呢次唔會再提㗎喇,唔係個個都好似校長(譚詠麟)咁。自己都有個打算希望做完個騷之後,會做一個Crossover嘅騷,男又好,女又好,可以互相唱吓大家嘅歌。不過我就會想搵個男仔,因為自己都想唱男仔歌,所以趁呢個機會公開吓,等大家有咩好男人介紹。(想喺紅館開?)都係,但都做完呢個騷先,先入紙申請。」

湯記稱雖然這次在九展開,但都會將紅館舞台,燈光等製作搬到九展,而場地適合三面台,但她要求不要再設計長樓梯,五年前黎瑞恩(阿恩)為她做嘉賓而在樓梯跌下來,她依然好記得,因此不想再發生意外。提到個唱嘉賓,湯記稱阿恩一定走不甩,還有陳曉東,因陳曉東很久未在港演唱,想給大家有新鮮感。湯記透露會為今次過唱繼續Keep Fit,她謂希望再瘦五,六磅:「因為戒食澱粉質,所以個人都有點躁狂。(仔仔可有受害?)都好少見,因為忙住搞演唱會,呢個月都見唔到24小時。佢都有投訴,我話媽咪要開演唱會,我仲叫佢嚟睇,佢答我盡量,小朋友唔逼得,要放手,功課都唔自己教,試過爭啲要除鞋,攞藤條,所以同埋啲功課真係好深,都唔知點解咁深,所以都係畀人教。」