黃智雯佗B博紮　玩謝Hea爆上司

黃智雯在新劇《雜警奇兵》中飾演「佗B師姐」，挺住巨肚查案奔波，身為單親媽媽的她一心「博紮」，偏偏遇着上司黃智賢多番阻撓。過慣悠閒生活的黃智賢並不是望早收工，而是擔心下屬動胎氣！

由黃智雯、黃智賢、黃心穎、C君等主演的新劇《雜警奇兵》將於本周日（24日）首播，並由晚上八時三十分至十時三十分一連兩小時播放。黃智雯在劇中飾演個性火爆的「佗B師姐」，與講究生活節奏的黃智賢個性迥異，為查案過程帶來不少笑料。

犯孕婦禁忌

由黃智賢（Ben）率領的雜項調查小隊（ME）負責一系列非刑事及無法分類的案件，當中包括查酒牌、狂迷滋擾、離奇命案等，職能範圍相當廣泛。小隊成員包括新進警花黃心穎、過氣臥底C君等，各有個性，Ben因最享受朝九晚五的生活模式，故隊中愛衝鋒陷陣的智雯最令他頭痕！

單親媽媽黃智雯個性進取，為求日後有條件獨力撫養孩子，不惜以身犯險調查案件，更以成為「屍王（專責調查命案的警員）」為目標，希望能夠火速上位。佗住巨肚的智雯不減搏殺動力，為追尋真相犯盡孕婦禁忌，如穿高踭鞋跑跳、放烽炮、揼釘等，可惜火爆師姐與上司摩擦不斷，智雯更成為Ben的眼中釘。

優差變苦差

智雯笑言接到孕婦角色時，以為是較文靜的角色，拍攝會相對較輕鬆，怎料卻是個不顧身勢的大肚婆，為腹中塊肉而潛力無限爆發，帶出連串動作場面。

袁文傑搣甩正氣變鹹濕佬

近期人氣爆燈的袁文傑在劇中有破格演出，飾演一名好色大明星，與臥底查案的心穎及C君有對手戲。作為參加TVB後首次喜劇演出，袁文傑最難忘在劇中有一個好色表情，為求喜劇效果盡力誇張演繹，自己亦期待播出時的效果。問會否擔心被網民Cap圖？袁文傑笑說：「唔怕嘅，作為演員，佢哋唔討論即係我未做到最好！（擔心影響從『游生』累積的正氣形象？）如果有突破演出都唔介意改改戲路，其實呢個劇係加入TVB後早期拍，當時游生都未出現，多啲唔同方面嘅嘗試，希望監製同觀眾都會滿意。」

黃心穎傾慕C君陷三角關係

黃心穎飾演新紮師妹，她直言入行至今一直恨演警察，心穎笑說：「以為終於有得演女警好開心啦！點知套制服都只係喺影道具證件相時着過一次。」心穎又笑言在劇中飾演正義感強勁的女警，個性「傻更更」，角色為她度身訂造。她一直夢想成為臥底，當遇上曾是「使徒行者」的C君，心穎對他燃起仰慕之情，而隊中更有「小鮮肉」郭子豪隨傳隨到，令他們陷入一段三角關係。

講到與C君合作，心穎直言過癮：「拍嗰陣一直笑唔停，對住佢轉數都快唔少！（覺得自己取代陸永地位？）應該唔得喇，據我所知C君同佢拍檔時都只係『下靶位』，或者下次我同陸永拍吓檔先！」