黃心美同陳安立唔過電：收佢做我契弟弟

藝人黃心美到電台宣傳新一輯旅遊節目，提到今次再同視障人士去旅行，她表示今次對方嘅未婚妻都會同行，所以感覺比上一輯輕鬆。不過心美指原本會做兩人嘅婚禮主持，但因為工作關係而未能出席，所以就介紹了陳安立給對方，她笑言：「佢第一句就問我同陳安立咩關係，可能係睇咗報道以為佢係我男朋友。（咁你哋係咩關係？）梗係朋友啦，我要一見鍾情㗎，同佢識咗6年都冇一刻鍾情過，諗住買金碗金筷子同佢上契，做我契弟弟。」

問到心美現時有否合適對象，她笑言大家不用擔心，因為有人追，但都是了解中：「人愈大，加上我之前瀨鑊甘，就會愈小心。（觀察咗幾耐？）幾個月啦。（會唔敢投入？）唔會，但會識分輕重，唔會投入咁多，要養活自己，唔可以靠男人。（唔係愛情至上？）戰前已經唔係，自己最可靠。」談到10月會同三妹同三妹未婚夫去冰島，心美笑指從來都未試過四姊妹去旅行，又笑言不可以跟心穎去旅行：「我哋兩個都唔會Plan，佢好大使但我就係去睇風景，可能有多個人中和會好啲。（搵馬國明一齊去中和吓？）吓？咁騎呢？好Odd（奇怪）喎！」