山田孝之變身「山田孝子」　驚嚇露毛

世界上只有山田孝之，可以超越山田孝之。

一向形象麻甩的日本男星山田孝之，近日一反常態變裝扮女人，仲當眾露毛。

最近大阪女子樂隊yonige舉行限定女粉絲參與的演唱會，不過男士一場可以入場，條件係要着女裝。山田孝之為咗睇呢個騷，竟然剃晒啲鬚，着咗一條露肩紅裙，孭住手袋着埋女裝涼鞋出席，大展他「風騷」一面。

不過山田孝之衰在剃鬚唔剃毛，只見佢露出成腳毛，刻意騷事業線卻露埋胸毛出嚟，變咗不男不女，不過就惹得全場爆笑，連yonige都爭住同他拍照留念。山田在社交網上載照片跟粉絲分享，網民仲幫佢改名做「山田孝子」，山田又自嘲除咗服裝之外，其實係麻甩佬一名，不過如果冇晒全身毛，就肯定係靚女。相片上載後，火速吸引20萬人次瀏覽。