胸骨紅晒勁嚇人　張可義嬲自己整傷舊患

模特兒張可義（Emily）早前突破自己，決定參加ViuTV節目《G-1格鬥會II》，喺日前舉行嘅首場賽事中，佢仲成功擊敗麥家琪。雖然Emily對戰麥家琪時看似輕鬆，但背後有苦自己知，皆因賽前佢不慎整傷左腳及胸骨，對戰前一日仲扭傷頸部，真係有血有淚！Emily表示：「其實自己唔怕輸，反而係怕整親，落場打時會發揮唔到，但估唔到我喺賽前整到條頸，當日係忍唔住喊咗出嚟，因為好嬲自己有舊患，仲咁唔小心又再整親。（依家傷勢點？）冇之前咁痛，但返到香港都會睇多次醫生，好好休養一排。」

Emily喺首場賽事獲勝，換言之可以留低繼續參與節目，問到佢會點樣備戰下一場賽事？Emily透露：「以唔整親嘅前提下加緊訓練，同埋都會練多啲肌肉，等自己唔好咁易傷。（贏咗一場會唔會信心大咗？）都會，贏咗一場好似打咗支強心針咁，估唔到自己可以嚟到呢步。雖然唔知最後輸定贏，但希望大家可以一直支持我，為我打氣。」加油呀Emily！