苗僑偉英文叻過連Piece雅考試都肥佬

無綫新劇《使徒行者2》現正熱播中，劇情緊湊之餘，仲差唔多集集都大灑鹽花，先有男神袁偉豪爆肌又露股，後有人夫陳豪晒胸肌，睇到大家「心心眼」。不過，有位男神唔使剝衫，單靠個樣已經風靡萬千少女師奶，佢就係型足咁多年嘅59歲苗僑偉。其實苗僑偉點止型仔咁簡單，佢喺首集《使2》已經演技大爆發，其中一場睇住臥底手下統統被炸死嘅戲份，鏡頭外都感受到佢嘅角色嘅悲痛，足以證明佢好戲。

眼見苗僑偉喺劇中嘅角色咁慘情，劇情又好沉重，無綫官方專頁「See See TVB」專程將《使2》其中一段片段重新搞笑配音，等大家唔使喊住煲劇！片中所見，苗僑偉參與考試作復職評估，點知上司鄧梓峰話佢考試肥佬，滿分12萬8千分中只係攞到89分咋，邊有可能先？就連網民都戥苗僑偉唔抵，仲搬出佢嘅金句：「我贏㗎，應該係我贏㗎！」冇錯，應該係佢贏㗎！

呢個時候鄧梓峰忍唔住向苗僑偉分析衰啲咩，其中一題苗僑偉要用英文安慰死者家屬，佢自信滿滿咁答咗「May he Rest in Peace」，以為文法啱又串字啱，點知輸在太有自信囉！皆因出題者話條題係假設死者被重型炸彈炸死，仲聲稱炸開一舊舊點會「Peace（安詳）」，梗係「Rest in Piece」，雖然苗僑偉答得好正路，但條題咁屈機，睇嚟都要向英文達人連詩雅請教吓先識答。

同場加映，片尾繼續抽乾水，要苗僑偉重演劇集《賭場風雲》嘅經典一幕「嘩！我4條煙！」，搞到苗僑偉嬲嬲豬話要辭職，而一班食花生嘅網民當然睇到爆笑啦，仲大讚重新配音版《使2》夠晒無聊又搞笑。

網民有話兒：

CarolXXXLo：好無聊，但係好好笑。

XXrryChXX：邊有可能咁低分先？三哥掩頭mode：我贏㗎，應該係我贏㗎！

XXXcarTam：竟然冇「我最期待嘅畫面出現」。

LudwigXXX：鄧梓峰又升咗職喎，果然每集喺咁意升一升。