鍾嘉欣捱到生蛇　馬浚偉火滾逼休息

藝人鍾嘉欣到電台接受馬浚偉的電台節目訪問，表示傾番之前的事及感情事，馬浚偉亦謂：「其實最難問係佢、陳法拉、楊怡嗰啲，因為同佢哋太熟、太錫佢哋，所以有啲事就費事問，不過今次就會講同佢兩次拍劇嘅難關，佢拍《蒲松齡》同《金石良緣》時都出大事。」其中拍《蒲》時嘉欣因為有思鄉病，以致失眠，每日好似喪屍，嘉欣表示：「我冇瞓過覺成3個月，有一晚食咗安眠藥，但我食完又冇即刻瞓，所以唔瞓覺喺屋企見到啲黑色嘅嘢，以為自己撞鬼，原來唔瞓覺真係會有幻覺。」

到拍《金石良緣》時，因嘉欣當時又要拍《溏心風暴》及拍戲，缺乏休息以致免疫力下降，搞到由頭到腳都好似生蛇般，而且又甩晒皮，馬浚偉表示：「拍緊一場戲時，我見到佢左耳甩皮，所以我就叫cut機，然後輕輕幫佢抆咗塊皮，其實嗰陣我好火滾，我叫佢冧，但佢話自己新人唔敢冧，所以我就同導演講『依家我唔舒服我要走，因為我見到我個對手咁樣我做唔到落去』，所以佢唔冧就我冧，然後捉佢出廠抖吓。」

作廁所歌

嘉欣亦謂之前經歷這些事是很難過，但現時睇番就覺得好好笑。問到是否更喜愛現時生活？她表示：「好鍾意，因為我有鍾意嘅加拿大同屋企，另一個就係香港，其實好多人都叫我只係選擇其中一邊，但我想自己成為例外，想兩邊兼顧到。」她亦謂其實希望有機會可以與馬浚偉唱番《金》的主題曲，馬浚偉亦謂其實有想過叫嘉欣演出其音樂劇，但嘉欣卻不能回港排戲太長，嘉欣即謂：「所以我依家啲幕後幫你，我為你個音樂劇喺廁所作嗰首歌。（點解要喺廁所？）因為個女喺樓上，同埋廁所響啲，同埋啲廁所就會諗起阿哥（馬浚偉）。」

返到香港變Big Boss

問到今次嘉欣會在港逗留多久？她表示：「兩星期，我尋日返到，其實我返到嚟先醒起原來我會嚟到過中秋。（今次屋企人有冇一齊返嚟？）有呀。（老公同個女都有？）係呀。（會唔會帶囡囡去賞月或去公園玩吓？）佢依家出咗去同緊我老公玩。（老公唔熟香港會唔會盪失路？）都會，同埋佢廣東話唔好，平時我係弱者㗎嘛，但返到嚟香港就變咗我係big boss。」