《韓薦》：崔始源新劇戀打工女神姜素拉

又到新一集《韓薦》啦！今期會為大家介紹男團Super Junior成員崔始源退伍之後的回歸新劇《卞赫的愛情》，今個月中就首播，崔始源今次飾演單純有錢仔，一直無所事事，至到佢去到鄉村隱居，識到高學歷而且樣樣都好叻嘅打工女神姜素拉之後，兩個人仲會擦出唔少火花！

今集仲會同大家介紹姜素拉男友玄彬孭飛嘅新片《騙子》，套戲仲有劉智泰同女團After School嘅NaNa合演，嚟緊11月就會喺韓國上映！另外，仲會介紹女歌手IU嘅第二張翻唱專輯《花書籤2》，其中一首收錄歌曲，就係翻唱自80年代末人氣男子組合消防車嘅《Last Night Story》，IU為咗呢首歌，仲專登染金髮拍MV，又跳埋復古舞，令Fans好驚喜！而最後就會同大家介紹綜藝節目《Show Me The Money 6》其中一位參賽者禹元宰，佢係節目中表演最突出嘅Rapper！