實習爸爸鄧倫講故事　萌寶小山竹爆喊

內地真人騷節目《爸爸去哪兒》自播出後都引起廣泛關注，當中陳小春嘅囝囝Jasper仲有吳尊嘅仔女，同樣獲網民大讚又乖又可愛呀！不過除咗佢哋外，當中實習爸爸鄧倫同紀美伊（小山竹）呢對組合一樣受人注目，皆因佢哋係唯一一對冇血緣關係嘅組合。雖然鄧倫年紀輕輕，不過佢都非常識得照顧小朋友，當中佢幫小山竹紮頭髮、塗太陽油等嘅舉動都令網民大讚佢哋好Sweet！

其實鄧倫近年嚟憑內地劇《因為遇見你》、《楚喬傳》等而為人熟悉，而小山竹雖然係一位素人，但由於佢憑住萌到爆嘅面孔，加上其超強表演欲，年紀小小已上過唔少綜藝節目，成為網絡紅星，吸引唔少網民嘅注視，所以今次佢同鄧倫父女檔，網民罷不能都話一定要捧場。

好似呢集就講到鄧倫同小山竹就住喺較簡陋嘅屋仔，但係小山竹都冇因而唔開心，仲安慰番鄧倫轉頭，真係好叻女。當完成一日任務後，臨瞓前鄧倫就諗住講個故事畀小山竹聽，佢仲用英文講《豌豆公主》，不過網民都好奇問小山竹聽唔聽得明㗎？鄧倫好用心用流利嘅英文講，小山竹就好乖咁一路聽，不過佢個樣就好似唔係好明喎，話口都未完，點知小山竹突然喊，仲話唔想再聽，聽唔明，簡直嚇親鄧倫，當大家以為鄧倫會唔知道點處理好，佢即刻攬住小山竹安慰佢，仲好貼心咁幫小山竹抹鼻水，又問佢凍唔凍，之後仲氹番佢話幫佢紮辮子，令到小山竹即刻笑番，仲好開心咁唱歌畀鄧倫聽，之後再嚟個大合唱，場面不知幾感人。大批網民都話鄧倫處理得好好，估唔到佢咁識氹小朋友，仲話佢哋之間嘅感情同真父女冇分別呀！

網民有話兒：

CXXVCSXX P：佢哋好sweet呀！

GXXMX NNXX：佢哋感情同真父女冇分別。

TXX DXXQ：我好鍾意小山竹，簡直萌到爆！

FASXXZX BXX：小山竹聽唔聽得明？

LXXTSXX：估唔到鄧倫咁識氹小朋友，畀個叻佢。