实习爸爸邓伦讲故事　萌宝小山竹爆喊

内地真人骚节目《爸爸去哪儿》自播出后都引起广泛关注，当中陈小春嘅囝囝Jasper仲有吴尊嘅仔女，同样获网民大赞又乖又可爱呀！不过除咗佢哋外，当中实习爸爸邓伦同纪美伊（小山竹）呢对组合一样受人注目，皆因佢哋系唯一一对冇血缘关系嘅组合。虽然邓伦年纪轻轻，不过佢都非常识得照顾小朋友，当中佢帮小山竹扎头发、涂太阳油等嘅举动都令网民大赞佢哋好Sweet！

其实邓伦近年嚟凭内地剧《因为遇见你》、《楚乔传》等而为人熟悉，而小山竹虽然系一位素人，但由于佢凭住萌到爆嘅面孔，加上其超强表演欲，年纪小小已上过唔少综艺节目，成为网络红星，吸引唔少网民嘅注视，所以今次佢同邓伦父女档，网民罢不能都话一定要捧场。

好似呢集就讲到邓伦同小山竹就住喺较简陋嘅屋仔，但系小山竹都冇因而唔开心，仲安慰番邓伦转头，真系好叻女。当完成一日任务后，临瞓前邓伦就谂住讲个故事畀小山竹听，佢仲用英文讲《豌豆公主》，不过网民都好奇问小山竹听唔听得明㗎？邓伦好用心用流利嘅英文讲，小山竹就好乖咁一路听，不过佢个样就好似唔系好明喎，话口都未完，点知小山竹突然喊，仲话唔想再听，听唔明，简直吓亲邓伦，当大家以为邓伦会唔知道点处理好，佢即刻揽住小山竹安慰佢，仲好贴心咁帮小山竹抹鼻水，又问佢冻唔冻，之后仲凼番佢话帮佢扎辫子，令到小山竹即刻笑番，仲好开心咁唱歌畀邓伦听，之后再嚟个大合唱，场面不知几感人。大批网民都话邓伦处理得好好，估唔到佢咁识凼小朋友，仲话佢哋之间嘅感情同真父女冇分别呀！

网民有话儿：

CXXVCSXX P：佢哋好sweet呀！

GXXMX NNXX：佢哋感情同真父女冇分别。

TXX DXXQ：我好锺意小山竹，简直萌到爆！

FASXXZX BXX：小山竹听唔听得明？

LXXTSXX：估唔到邓伦咁识凼小朋友，畀个叻佢。