簽字結婚！吳若希正式升呢做人妻

今日係吳若希（Jinny）嘅大喜日子，佢同男友Alex正式簽字結婚！簽完字之後，吳若希仲同老闆何哲圖喺big big channel做直播添！

冇得管錢嬲豬？

受訪時，問到Jinny有咩感覺？佢就話：「冇咩感動，我哋係喺歡樂之中簽字！冇咩蝦碌嘢，係嫌張嘢寫得唔夠詳情，冇講啲錢邊個管囉！」今次Jinny選擇咗喺唱片公司度簽，係因為人生大事都喺呢度做！佢哋仲搵埋老闆何哲圖做見證人，何哲圖都話有嫁女嘅感覺喎！

十全十美

問到點解揀10月10日，Jinny話：「冇特別meaning，搵人擇咗日，同埋覺得10月10日好十全十美！」再問佢Alex有冇求婚？Jinny話：「冇，冇都冇所謂，但有就更加好囉！」講到會唔會擺酒，Jinny就話怕麻煩所以唔會大搞，佢話：「屋企人都好開通，會喺外地行禮。」又話唔會喺教堂行禮，以簡單為主，又話平時靚衫台慶都可以着到，留番到時着喎！

囡囡愈醜愈鍾意

再講吓囡囡，Jinny居然覺得個女醜喎，佢話：「佢好肥但下巴好尖，好似我，但佢愈醜就愈鍾意！同埋佢好鍾意笑，笑聲好特別！」點解唔帶埋個女嚟，佢話有諗過，但今次留喺香港時間長，但唔想囡囡辛苦，所以冇帶到嚟。

自稱做師奶

Jinny之後喺ig晒相，留言話：「10月10日，好日，簽個字，請叫我何師奶～今日我倆一切從簡在唱片公司，在律師同老闆Herman及一些好友見証（證）下，與Alex正式結婚～希望大家可以祝福我倆，像結婚誓詞一樣愛護及包容大家，令這段婚姻得到真正的美滿～??」Alex都有晒相，佢哋仲sweet爆整個心心添，好sweet呢！