開極都係炒！陳奕迅唔明點解咁多黃牛飛

歌神陳奕迅（Eason）在旺角麥花臣場館舉行一連兩場「Eason says C'mon in~Tour」，首場完騷後Eason接受訪問，講到今次新碟音樂會門票在網上被炒至7,000蚊一張，場外亦有操普通話的人在賣黃牛飛，Eason即言：「吓！點解佢哋買到咁多？排隊架？我真係唔知點解。」Eason澄清明年2018年不準備在港開演唱會，最快都要到2019或2020年，同時都要看能不能申請到紅館檔期。

提到那英在微博發聲明指不再擔任《中國新歌聲》導師一事？Eason有點愕然，但就表示不知道，他估計那英做了6年節目可能有點累之故。問到下一季Eason可會再做？他謂未知，要再諗吓。對於有傳那英因比賽有黑幕才辭任，Eason說：「咁叫我撳掣算唔算黑幕？撳唔撳最終決定權都喺自己手上，奈我哋唔何。」網民指那英做導師欠公平？Eason謂：「咁網民噏乜都得㗎啦！」

另外Eason早前在ViuTV節目上打呵欠模仿黎明（Leon）唱歌，遭Leon粉絲鬧爆指他不尊重？Eason澄清：「真係冇咁意思，實不相瞞，我呢1，2年同Leon有聯絡嘅，有啲私交，先夠膽模仿佢搞搞氣氛，如果唔熟嘅人我係唔敢咁做嘅，我入行20年啦，都踩過唔少『屎』，唔敢亂嚟嘅！」