娛樂專題:黎美言打不死愈賤愈強

20171012
東網電視
更多新聞短片
黎美言最近專心學巴西柔術!
歌手黎美言(Winkie)由唱歌的女子組合HotCha演變成單飛藝人,還大改過往的清純可愛形象走打女路線,學泰拳、巴西柔術玩格鬥比賽,打得遍體鱗傷,經歷低潮的她曾問「點解要作賤自己」,最終從搏鬥中領悟人生,如此難關都能過,沒甚麼可再難到她!
傷胸骨呼吸困難
今年入行十周年的Winkie,2007年與張惠雅及張紋嘉成立女子組合HotCha,以清純、活力的形象打動少男歡心,後來組合於2014年解散,之後加入了名媛諸葛紫岐的娛樂公司,向樂壇及影壇進發。去年Winkie參加ViuTV的MMA真人騷《G1格鬥會》,拚命的演出,備受讚賞,更獲邀參演電影:「其實參加完《G1》之後,有諗過行武打路線,細個都好鍾意睇武打片,好鍾意楊紫瓊、成龍、李連杰等,打《G1》發現打拳好好玩,愛上咗,仲去考咗教練牌,去年4月開始收學生,教人打泰拳。《G1》帶畀我好多嘢,令到我有機會返內地拍戲,之前拍咗一部關於武打嘅網絡電影,第一次做女主角,之後又有好多試鏡嘅機會,之後都會向武打路線發展。」
凡事總有犧牲
Winkie主打泰拳,最近再攻巴西柔術,見她與教練對打時有板有眼,埋身搏鬥,又撻生魚咁撻,愈打愈起勁。問為何會想學巴西柔術?她說:「《G1》時係打MMA綜合格鬥,裏面主要有泰拳、有巴西柔術,而我最差係巴西柔術,當時學唔夠就去打,打輸咗,所以覺得喺邊度跌低就要喺邊度爬番起身,將自己唔好嘅嘢改善,依家會一路學上去,對我嚟講好難,但我遇強愈強,邊個位唔得就學番好。」雖然當時打到遍體鱗傷,有苦自己知,Winkie說:「最嚴重嗰次係傷到胸骨,當時連抖氣都辛苦,打第一場時,連吸氣都差啲吸唔到,嗰時喺屋企真係差啲崩潰,成身藥膏,自己一個人住,返到屋企仲要做家務,都會諗其實我咁辛苦為乜,對住鏡同自己講點解要咁樣作賤自己,但嗰一格好快就閃走,同自己講,你如果連咁嘅難關都過到,以後冇嘢難到你,將來面對所有事情都好容易解決,凡事總要有犧牲,睇得開就OK!」
擇偶要揀正常人
當年18歲入行的Winkie,由一個不懂事的?妹,經過歲月的洗禮而成長,她說:「初入行係組合畀人形象可愛、好純真,依家獨立發展後,我畀人感覺都係好開心、好正面,其實我自從打咗拳後,對之前負面或攻擊我嘅新聞,都會正面面對,希望以後都保持正能量畀大家睇。雖然依家主力做演員,但我冇放棄做歌手嘅身份,今年入行十年,會出一張屬於自己嘅唱片,呢方面老闆都好支持,一路收緊歌,我對歌詞都好執着,所以一路改緊,希望有最新作品同大家見面。」
借歌講情史
講到歌路,Winkie說:「以快歌為主,我好鍾意快歌,但都會有慢歌,大家一直都冇聽過我講自己嘅愛情故事,入行以來都有拍過拖,有啲愛情感覺會放喺歌詞度。(依家有冇拍拖?)依家單身,但So Far拍過幾次都係長拖,對方都對我好好,就算唔夾,分手都可以保持聯絡。」Winkie揚言已到談婚論嫁的時候,但真命天子最終未出現:「唔知真命天子幾時有,但我對婚姻有憧憬,覺得自己對另一半會好好。(有咩條件?)正常,你知依家好多人唔正常,要愛錫家庭,同埋鍾意小動物,連寵物都照顧好,對人都應該會好好。」
組HotCha喊到爆血管
入行十周年,經歷不少苦與樂,Winkie表示最難忘是出道第二年就可以開演唱會:「雖然唔係好大型,但已經好有滿足感,入行時有好多代言、贊助,備受寵愛,之後諗埋咗一邊,覺得其實組合可以行到幾遠呢?好多唔開心嘅嘢,但又唔鍾意帶負能量畀人,成日收埋自己喺屋企喊,喊到眼微絲血管都爆裂,令到家人擔心,話唔係等我養,如果真係唔開心,就唔好做,陰暗期都持續咗兩三年,人同人相處最重要開心、要夾,都好多謝組合帶畀我嘅嘢。有唔開心對自己唔好嘅人,但我覺得如果唔係佢哋,我亦唔會變到咁堅強,打完比賽後,更唔會理負面新聞,朋友、家人、健康都重要,成個人走出陰霾,冇咩嘢可以令我傷心。」
問到是否之前與隊友不合拍?Winkie坦言:「組合開頭好夾,去到後期可能每個人都想做自己歌,例如我想做Hip Hop,你想做Rap歌,好睇大家夾唔夾,可以我讓步時,你又未必讓步,身邊有好多唔同聲音,如果唔堅定就好易被離間,組合分開都好唔捨得,但會支持祝福對方,始終曾經係戰友,但我唔會牽連太多是非,好似一對情侶就算分開都一定係雙方有問題,我唔會出嚟講太多嘢,只要努力去做,你嘅努力有目共睹。」