上完《中國有嘻哈》　MC Jin話自己發咗…

饒舌歌手歐陽靖（MC Jin）出席造型師好友的品牌活動，講到因參加內地音樂節目《中國有嘻哈》而這幾個月一直在內地工作，他坦言：「呢四、五個月好似係發咗…同發緊一場夢。」記者打趣以為佢指發咗達，他即笑言：「成功嘅定義每個人都唔同，我今日都有諗呢樣野，但得出嘅結論係好感恩。有啲人係用賺錢同名氣嚟衡量，但只要每日起身健康、屋企人健康、做到自己鍾意做嘅嘢就係成功。」

開10場內地巡演

講到他將於內地舉行巡演，他表示11月尾會舉行第一場巡演，會到北京、上海、廣州等地舉行共10場巡演。問到可會想在香港開騷？他表示：「我梗係好想，大型或迷你都想，但要睇機會。」講到他之後將忙於開演唱會，聖誕豈不是沒有時間陪美國的家人？他表示太太及囝囝計劃過來陪他工作。

囝囝人仔細細識講數

講到他經常要外出工作，可會掛住囝囝？他表示：「勁掛住，呢段時間最大挑戰係同屋企人距離遠，依家我出門口返工，囝囝就會話『Daddy，返工again？』，我就會話『返工係好事，可能要去20 days，但返工就賺錢多，賺錢多就買玩具同去迪士尼多』，跟住佢就會話『20 days夠唔夠？』。同埋如果我走7日，佢會叫我買6件玩具，走20日就叫我買19件玩具，不過無論我有冇買玩具都好，佢都係會勁開心。」