黑幫狂人張建聲 難抽離角色3度求醫精神科

20171020
東網電視
更多新聞短片
張建聲曾因為太入戲而情緒受到影響,要三度睇精神科醫生。
藝人張建聲(Justin)入行六年,經常接演一些富挑戰性的角色,早前為演出近期熱播網劇《反黑》,便漂染眉髮飾演黑幫狂人「招積」一角,由於演得實在太入型入格,令不少內地網民更加認識張建聲,有些網友更指他的角色像是吳鎮宇經典角色「靚坤」的狂野版!對於如雪花紛飛的讚美,張建聲並無飄飄然,並直言:「嘩!同鎮宇嘅神級靚坤真係唔能夠相提並論,或者因為我喺演繹呢個角色嘅時候,會不經常咁用咗一啲眼神或者肢體語言,係有啲靚坤嘅Style,好感恩有一個咁好嘅角色畀我去演,亦好多謝觀眾咁喜歡套劇同招積呢個角色。」
讚陳小春係好前輩
劇集播映18日點擊率衝破8億,足證戲味十足,不少觀眾追住睇,而劇中有不少高潮戲,當中,令張建聲最難忘的一幕,要數他與陳小春講數的一幕,他謂:「招積」重遇陳小春飾演嘅「陳Sir」呢一幕,真係好有劇力,因為佢對招積影響好深遠,兩個人嘅情感好複雜,陳Sir係招積敬畏嘅大佬,亦係出賣過佢嘅仇人,當佢啷住一泡眼淚,好多心底話想同陳Sir講嘅時候,又唔能夠係啲細嘅面前失威,嗰種複雜,真係令我好深刻,(事前係咪要花好多時間去培養感情?)又出奇地唔使,因為已經入晒戲,我好自然咁演到出嚟,狀態好好,小春哥(陳小春)係一個非常好嘅前輩,佢只會提示我,唔會講太多,等我哋有進步空間,呢啲前輩真係好正。」
陳小春與兒子Jasper於內地節目《爸爸去哪兒5》嘅溫馨又搞笑的互動,近期成為網熱,其中,有些網民說小春不夠耐性,問張建聲平時小春又是一位怎樣的演員?張建聲先搞笑地說了一句Jasper的金句「Can you stop angry now?」跟着表示:「Jasper好可愛,陳Sir(陳小春)係一個好認真嘅演員,佢對演戲好執着,之前未同佢合作過,會以為佢係一個好愛玩嘅人,但其實唔係,佢係會攞住個劇本好畀心機去睇嘅人,如果遇到一啲唔係好順暢嘅位,佢會諗啲方法去改變佢,係一位非常專業嘅演員。
多得秋生開解
「招積」這個角色很成功,但張建聲卻因為太入戲而令到自己無法抽離,因而情緒受到影響,要三度睇精神科醫生,幸最終自己都能想通,走出抑鬱的陰霾,他謂:「由籌備到拍攝,我用咗八個月,將自己投入咗喺個角色入面,可能未夠功力,拍完要好用力咁抽出去,見過幾次醫生,醫生話我一時間未習慣,有啲焦慮、強迫症,好彩拍完之後,我接咗一個輕喜劇,再加上機緣巧合之下遇到黃秋生,佢好好,教我唔好同個角色掙扎,由個角色放喺心入面成長,就好似《24個比利》咁,總之,自己心入面有幾多個角色都好,搵一個做校長,之後跟着個校長行,我聽完之後,自己返屋企慢慢消化,真係舒服好多,之後做番啲自己平時會做嘅嘢,好似踢波咁,慢慢就甩番開個角色。」