楊洛婷爆胸復工　老公幫囡囡掃風兼餵夜奶

上月14日誕下女兒的藝人楊洛婷為2017東方表行沙田錦標「時尚煲呔賽馬日」擔任司儀，以粉紅色低胸裙谷胸上陣的她透露今次是產後復出的首個工作，笑言大會早在一年前已預約她。

問到會否很掛念女兒黃子霏？楊洛婷說：「梗係，我好忙，出門口前先餵完奶，啱啱趁有時間都揼奶，我會好掛住個女。」她又指女兒是大食妹，五星期大的女兒每餐已經要食8安士奶：「呢個係三、四個月嘅食量，一個月已經重咗3磅幾，依家應該有10磅，佢嘅食量真係好驚人，佢同我一樣，唔食唔得，否則會發脾氣，前一晚佢飲咗超過8安士奶，破晒紀錄，但依然唔肯瞓，我之後又餵佢飲多100毫升，佢依家有三下巴。（BB使唔使減肥？）醫生話都OK，佢保持呢個食量就得。（咁你夠唔夠奶？）我有時都唔夠，要補奶粉。（抱BB辛唔辛苦？）都攰，所以我餵完就畀老公掃風。夜奶老公喺度都會幫手餵12點嘅夜奶，我就負責餵凌晨4點果餐，所以依家好早起身，每晚9點就瞓，同以前嘅生活好唔同，但我好想出嚟工作，做Working Mom。」