賣豪宅套現！林作爆兩母子財政告急

前大律師林作又做補習天王，又做幕前，最近更簽畀范振鋒，應該都搵唔少，但林作竟然喺社交平台驚爆話媽媽需要周轉，而要賣樓，寫道：「實不相瞞，屋企最近環境急轉直下，已經在蘊釀（醞釀）出售所謂豪宅。」但其實林作媽媽去年以6千多萬買了麥當勞道的3千多呎複式豪宅自住，而同棟另一單位有傳當年是給林作與麥明詩結婚之用，但可惜二人分手收場。

「整合吓啲物業」

對於賣樓一事，林作回覆東網直認不諱說：「媽咪話生意需要錢周轉。（媽咪生意唔掂？）唔知，佢同我講要賣樓，未諗賣邊間，有其他物業，係整合吓啲物業。（之後一齊住？）係，慳得就慳，我孝順，佢話點就點，優化資產管理係好，我拍拖結婚又遙遙冇期。（所以媽咪賣層樓？）唔知，佢想我結婚，但我又冇女朋友點結婚，可能佢失望而收番。」

自認大使

林作稱好擔心媽咪，廢寢忘餐，愁眉深鎖，所以要努力搵錢，收入要充足，有自己的生活。他更自爆好大使，又碌爆卡，要靜靜雞上網賣名牌、手錶及西裝，甚至連飯錢都要問朋友借。他更坦言被媽咪突然要錢周轉而嚇親：「阿媽都係靠唔住，要靠人家。（追富二代女？）冇計，唔係得港姐想嫁入豪門，我都想入豪門。」